alang kanimo babs
Kung kami diri daw mga pi-ot nga sardinas de lata,
sila didto mura ug mga hipon nga gipugos ug igo sa gamayng plastik para suwa sa manggang hilaw.
Ang mga ganina rang gayamyam, gabuwa-buwa na ang baba.
Pag-abli sa gamayng pultahan nga gabuwag sa nganhi ug ngadto,
mura ti-aw ug mga piniriso nga midangop sa kural ang mga ganina rang gahuwat nga pasahero.
Dunay uban bugal-bugalon kaayo,
mubuga ug pasumbangay nga kataw-anan matag karon ug unya.
"Bai, kuha-a nalang ni among tiket ug amo nalang langyon!"
Ug tungod gabrown-out man dinhi sa pier, may niingon,
"Diara atong sakyan o," nga mura ba ug dunay umaabot,"wala lay suga."
Ug dunay mitubag sa iyang joke,
"Gabrown-out ang ferry boat."
Giputlan sa MECO o VECO ba kaha.
Aduna pay wala nabalaka.
Nanigarilyo pa.
Inig gawas nato niining tangkal, manga-high na tang tanan.
Gasagul na ang galain-laing baho,
ga-isa na ang mga dagway niining mga tawhana.
Wala pa gayud naabot ang ferry boat.
Basin ug nagprosesyon ang gamayng barko.
Balo lamang.
Nilanding na ang ferry.
Kasabot ko nga naa na ang atong only hope sa kahaw-asan,
pero intawn, katawhan,
ayaw panukmod kay basin kitang tanan manga-umod.
Unsaon nalang.
Apan Babs, kung ikaw ani-a uban kanako,
kitang duha ang makaagi niini.
Bisan pa,
kahibaw ko nga kasabot ka,
kay ingon niini ang atong paghuwat.
Paghuwat anang adlaw nga kita manglaag.
Anang atong adlaw daw "forthcoming ride".
